Алматыда Еуропаның Ұлттар лигасындағы үшінші кезде­суінде футболдан Қазақстан ұлттық құрамасы Албанияны қабылдап, 0-0 есебімен тең түсті.

Билектің шәкірттері алаңға тек жеңіс үшін шыққанымен, ойын олар үшін ауыр өтті. Албания оңай шағылатын жаңғақ емес екенін алғашқы минуттардан-ақ дәлелдеді. Тіпті барлық көрсеткіш бойынша Балқан түбегінен келген футболшылар қазақтардан басым түсті.

Дегенмен қорғаушылар мен қақпашының шеберлігі арқасында біздің қақпаға доп дарымады. Ал шабуылшыларымыз допқа иелік еткенімен қонақтардың әлсіз тұсын таппады.

Осылайша Қазақстан құрамасының қоржынында 4 ұпай жиналды. Дәл осындай көрсеткішпен албаниялықтар ізімізден келеді. Беларусь пен Литва құрамасында 3 ұпай бар. Бірақ олар өзара кім мықтыны бүгін түнде анықтайды.

Келесі ойында Қазақстан құрамасы сырт алаңда Беларусь құрама­сы­мен кездеседі. Матч Минскте бүгін өтеді.