ҚҰРАМА ЖАҢА ЛИГАДА ЖАТЫРҚАП ЖҮР
Ұлттар лигасы құрылғанда құраманың болашағын биікке қойған едік. Еуропаның негізгі додасына түсер күн жақындады деп сендік. Жеребеге сәйкес Грузия, Латвия, Андорра түсті. Қараса4ыз 3-еуінде ұтуға болады. Оның үстіне Стойловтың бапкерлік біліктілігі үшеуін еңсеруге жететіндей көрінді. Әйтсе де, біздікілер айды аспанға бір-ақ шығарды. Алдымен Грузиядан өз алаңымызда оңбай ұтылдық. Одан соң футбол ұғымы әлде қайда төмен Андорраға қонаққа барып, ұпай бөлістік.Біздің құрама Грузияға 0:2 есебімен жол бергеннен кейін, қонақта жеңіске жетуге бар күшін салатыны белгілі еді. Олай болатын жөні бар. Бұл кездесуде ұпай жоғалтсақ6 біздің құрамаға топтан шығу мүмкіндігі қиындай түседі. Біздің басты қарсыласымыз – Грузия екінші ойынында жеңіске жетіп, ұпай қоржынын молайта түсті . Бірінші турда Латвия мен Андорра 0:0 есебімен тең түсті. Ендеше, Андоррадан айла асыра алмасақ6 біздерге жолдаманың ауылы алыстай түсері анық. Қазақстан құрамасының бас бапкері Станимир Стоилов құрамға біршама өзгеріс енгізді. Бұл жолы негізгі құрамда Еркебұлан Тұңғышбаев пен Юрий Логвиненконы алғашқы минуттан жасыл алаңға шығарды. Грузиямен кездесуде олардың орнында Сергей Малый мен Георгий Жуков болған еді. Біздің жігіттер бірден-ақ шабуыл шебіне көңіл бөлді. Алаң иелері қақпасы маңында бірнеше қауіпті сәттерді ұйымдастырды. Десе де андорралық футболшылар да қарап қалған жоқ. Кейбір сәттерде қарсы шабуылдарға шығып жатты. Ойынның 25-минутында біздің құрамаға гол соғатын мүмкіндік болған еді. Сол қанаттан берілген пасты қақпа алдында тұрған шабуылшылар өз пайдасына жарата алған жоқ. Ал 31-минутта өзіне әуелеген допты баспен қақпа алдындағы әріптестеріне бағыттаған Роман Муртазаевтың әрекеті де сәтсіз болды. Бірінші кезеңде қос құрама да есеп аша алған жоқ. Қазақстан құрамасы Андоррадан 3 ұпай алудың барлық мүмкіндігін қарастырып жатты. Екінші кезеңде де ойын тізгіні біздің қолымызда болғанмен оны голға айналдыру қиын тиіп жатты. Кейбір сәттерде дәлдік те жетіспеді. Осындай қауіпті сәт 60-минутта болды. Оң қанаттан әуелете берген допқа Серікжан Мужиков сәл ғана жетпей қалды. 64-минутта Бауыржан Исламхан да андорралық қақпашының шеберлігін сынап көрді. Оның алыстан шірене тепкен добын қақпашы Хосе Гомес әрең дегенде сыртқа шығарып үлгерді. Ұлттар лигасындағы біздің құраманың алғашқы голын қорғаушы Юрий Логвиенко өз еншісіне жазды. Ол сол қанаттан әуелете берген допқа бәрінен биік секіріп, қақпа торын бүлк еткізді. Бұл ойынның 68-минуты болатын. Ал 75-минутта Серікжан Мужиков екі ескертуден соң алаңнан қуылды. Ал 84-минутта Андорра таразы басын теңестіріп кетті. Оны Жорди Алаез соқты. Ойын 1:1 есебімен тең аяқталды. Үшінші тур ойындары енді 13 қазанда өтеді. Бұл күні Қазақстан Латвияға қонаққа барса, Андорра сырт алаңда Грузиямен кездеседі.
