Ауыр дертті жеңген «Барса» футболшысы Мессиге шағымын айтты
«Барселонаның» бұрынғы қорғаушысы Эрик Абидаль клубтың кезекті ойындарының алдында командаластарына қолдау мақсатында видео жібереді. Ол сол кезде видеоны көрген Лионель Мессидің не айтқанын Marca басылымына мәлімдеді.
Абидаль «Барселонада» 2008-2013 жылдар аралығында ойнады. Француз өзінің ауыр дертіне байланысты клубтан кеткен. 2012 жылдың сәуір айында ол бүйрегін ауыстырды. Оған Жерар есімді бөлесі донор болды.«Сырқат – мен өмір бойы ұмытпайтын қасірет... Мен ауырып жүргенде өте арық болдым. «Барсаның» кезекті бір ойынының алдында команданы қуантып, оларға қолдау көрсету үшін видео жолдадым. Сонда маған Мессидің не айтқанын білесіз бе? Ол енді мұндай видео жібермеуімді сұрады. Өйткені, видеоны көру оларға ауыр тиеді екен. Ал, мен оларды қолдағым келді. Бірақ ол маған «тірі өлікті көру оңай емес, біздің көңілімізді түсіреді» дегенді айтты», - деп ренішін білдірді футболшы.
2014 жылдың желтоқсанында Абидаль спорттық карьерасын тоқтатқанын мәлімдеді. Ол «Монако», «Лилль», «Лион», «Барселона» және «Олимпиакос» сынды клубтарда ойнады. Франция ұлттық құрамасы үшін 68 матч өткізді.
