Талаптың мініп тұлпарын...Иә, талабың таудай болса, келешегіңде жарқын болатыны анық. Ал, бүгінгі таңдағы басты талаптардың бірі – білім. Осы тұста Елбасының мына бір құндылығын жоймаған сөзі есіме  түсті: «Қазір бой жарыстыратын емес, ой жарыстыратын заман». Демек, бар назарымызды оқуға, білімге аудару керек деген сөз. Көп оқыған озар. Бәрінен озамын деп қоғамда болып жатқан өзекті мәселелерден тыс қалсаң тағы болмас. Жалпақ тілмен айтқанда, ізденістік танытып, білімге зейін қоя жүріп, еліміздегі саяси жаңалықтардан хабардар болып, құлақ түріп жүруіміз жөн болады. Себебі, қоғамдық мәселелерге сергек болсақ, өзімізді одан әрі шыңдай түсеміз. Егер «өскелең ұрпақ бізге қарап бой түзеу керек» екендігін ескерсек, алдымен білім деңгейімізді арттырған жөн.

   Қазіргі таңда еліміздің барлық өңірлерінде білім саласына түрлі мүмкіндіктер жасалған. Айталық, «үштілділік – заман талабы»,  сабақтар үш тілде өтіп, мектептеріміз түрлі технологиялармен жабдықталған. Бір сөзбен айтсақ, сауатты да саналы шәкірт тәрбиелеу жолында барлық жағдай қарастырылған. «Мен жастарға сенемін!» (М.Жұмабаев). Қанаттыға қақтырмай, тұмсықтыға шоқтырмай, перзентінің болашағын ойлап, шыр-пыр болатын ата-анамыз, «бала – балым, баламның баласы – жаным» деп тілеуімізді тілер ата-әжеміз болашағымыздың бұлыңғыр болмауын тілейді. Ал, сол үкілеген үмітті ақтау – басты мақсаттың бірі. Осыдан кейін ойланыңыз: «Мен сол үмітті ақтай аламын ба?» деп. Әрине «иә», тек оған талпыныс жасап, көп тер төгіп, мақсатқа жетпей тынбау керек.