Облысымызда өткен Hackday фестивалінде үздік деп танылған жобаның бірі – «Qamqor». Әлеуметтік жағдайы төмен отбасыларына жәрдемдесу мақсатында жасалған бағдарлама авторы –  Арайлым ЕСІРКЕП, Анар МАТЖАН, Аружан БЕКМЫРЗА жоба туралы баяндап берді.

«ҰСТАЗЫМЫЗ ҚАНАТТАНДЫРДЫ»

Мектепте 10-сыныпта робототехника пәнінің мұғалімі программалаудың тәсілдерін таныстырды. Сырттай қиын көрінгенмен, меңгеруге талпынсаң, қызықты сала екеніне көз жеткіздік. Осыдан бастап, ақпараттық технологияларды зерттеуге бел будық. Тобымызда әрқайсымыздың міндетіміз бар. Арайлым – спикер, Анар – программист, Аружан – дизайнер.

«QAMQOR» ЖОБАСЫНЫҢ ИДЕЯСЫ

Электронды бағдарлама қоғам мен тұрмыстық жағдайы төмен отбасы арасындағы көпір болса деген мақсат болды.  Қаладағы әлеуметтік жағдайы төмен отбасылардың тізімін алып, көмектесуге шешім қабылдадық. Себебі бәріміздің үйімізде киілмейтін киімдер, керек емес тұрмыстық заттар жеткілікті. Көбіміз мұндай заттарды қайда апаратынымызды білмейміз. Бағдарламаны ұялы-телефонға жүктегеннен кейін аты-жөніңіз бен мекен-жайыңызды тіркейсіз. Егер заттарды өзіңіз өткізгіңіз келсе, бірнеше нысанның мекен-жайы ұсынылады. Сондай-ақ, тапсырыс берсеңіз, өзіміз алып кетеміз.

«ЖОБАҒА ИНВЕСТОР ІЗДЕУДЕМІЗ»

Жақында облыс әкімі мен жеке кәсіпкерлер алдында бағдарламаны таныстырдық. Бұл бағдарламаның үлгісі ғана. Енді жүзеге асу үшін инвестор керек.

 

«КICKSTARTER» БАҒДАРЛАМАСЫ ҰНАЙДЫ

Бұл – американдық бағдарлама. Қолданушы тың идеясы, жаңа жобасы туралы ақпарат қалдырады. Сондай-ақ, жүзеге асу үшін керекті қаражат мөлшері мен уақытын белгілейді. Әлемнің түкпір-түкпірінен бағдарламаның мақсатын ұнатқан адамдар қаржылай қолдау білдіреді. Егер қаржы жиналып, жоба белгіленген уақытта іске қосылмаса, иелеріне қайтарылады. Мұндай бағдарлама біздің елде жоқ. Жастардың бастамасына демеу болсақ деген ниетпен, «кickstarter» сынды жобаны қолға алуды жоспарлаудамыз.