Халықаралық әйелдер күні қарсаныңда облыс орталығындағы Көркемсурет галереясында балалар арасында «Менің Анам ең қымбатты» тақырыбында сурет салу байқауы өткізілді.

    Оған  «Фирма «Best-Service LTD» қызметкерлерінің  6-14 жас аралығындағы балалары қатысты. Байқаудың демеушісі - «Фирма «Best-Service LTD» ЖШС. Балалар тақырып бойынша өз өнерлерін ортаға салып, өздерінің қымбатты аналарының бейнесін қағаз бетіне түсірді.

    Жарысқа ҚР суретшілер одағының мүшесі, Нартай Бекежанов атындағы театр суретшісі Темірбек Сағынбаев, Көркемсурет галереясының меңгерушісі, ҚР суретшілер одағының мүшесі Гүлнар Рамазанова, «Фирма «Best-Service LTD» бас директоры Ли Гром қазылық етті.

    Байқауға қатысқан 70-тен астам балақайлардың ішінен оза шауып І орынды Бақдәулет Рахымжан, Серікбай Әділет, Жания Махамбетова жеңіп алды. Келесі жүлделі орынға – Мадина Серікбай мен Әділет Серікбай, Зере Алмат тұрақтады. Ал ІІІ орынды – Богдана Звягина, Шахзада Шакирова, Сабира Есқараевалар алды. Бибінұр Бақытхан, Дана Серікбай  ынталандыру сыйлықтарымен марапатталды.