Бұл туралы «Ақ Жайық» басылымына сілтеме жасап Stan.kz хабарлайды.

Атырау қаласындағы Мағжан Жұмабаев атындағы №1 мектептің 22 оқушысы Қазақстанның ең сұлу аруының қолынан сыйлықтар алды.

Мағжан Жұмабаев атындағы №1 мектеп директоры Гүлжан Қожахметованың сөзінше, Альфия балаларға көмектескісі келетінін бір ай бұрын айтқан. Мұнан кейін сынып жетекшілер мен ата-аналар біріге отырып, оқушыларға қажетті заттардың тізімін жасапты. Олардың ішінде рюкзак, спорттық аяқ киім, костюмдер мен басқа да заттар бар.

«Мектеп ұжымы мен ата-аналардың атынан Альфия Ерсайынға көп алғыс білдіреміз. Алдағы «Әлем аруы» байқауында сәттілік тілейміз», – дейді мектеп директоры.

Альфия ақын Мағжан Жұмабаевтың өлеңдерін сүйіп оқитындықтан, таңдауы ақынның есімімен аталған мектепке түсіпті.

Бойжеткеннің айтуынша, ол алдағы уақытта да қайырымдылықпен айналысқысы келеді.

Өз кезегінде оқушылар Альфияға алғыс ретінде концерт ұйымдастырып, ән айтып, би биледі.