Каталониялық «Барселона» қысқы трансферлік кезеңде өз қатарын толықтыруда. Бастапқыда жарқ етіп Еуропа футболын тәнті етіп, кейін сол биігінен аздап төмендеп кеткен ойыншы Кевин-Принс Боатенг енді Барсаның намысын қорғайды. Каталониялық клуб ойыншыны италиялық «Сассуоло» клубынан жалға алған. Осы келісім үшін италиялық клуб 2 миллион еуро алған. Бұл маусымда ганалық ойыншы 13 ойында 4 гол соғып, екі рет нәтижелі пас берген. Боатенг бұған дейін де Испания чемпионатының дәмін татқан ойыншы. 2016/17 жылғы маусымда ол «Лас-Пальмас» сапында ойнап, 28 матчта 10 гол соққан болатын. Оған дейін футболшы «Милан», «Айнтрахт», «Шальке», «Боруссия», «Герта», «Портсмут», «Тоттенхэм» секілді клубтарда ойнаған.