Бүгін Қазалы ауданы әкімдігінде облыс аумағындағы дене шынықтыру және спорт ұйымдарының қызметін үйлестіру мақсатындағы көшпелі отырыс өтті. Жиынды аудан әкімі Мұрат Ергешбаев ашып, жүргізіп отырды. Мәжіліске облыстық дене шынықтыру және спорт басқармасының басшысы Олжас Әкімов бастаған жұмысшы топ арнайы қатысты. Жиында аудан басшысы өткен жылы спорт саласында атқарылған жұмыстарды атап өтті.
– Былтырғы жылы аймақ басшысының қолдауымен орталық Жалаңтөс батыр стадионында жөндеу жұмыстары жасалды. Сонымен қатар облыстық спорт басқармасы тарапынан 6 ауылға, атап айтсақ Кәукей, Бекарыстан би, Түктібаев, Басықара, Жалаңтөс батыр, Жанқожа батыр ауылдарына күрес, тоғызқұмалақ, бокс, волейбол спорт түрлерінен жаттықтырушылар бөлінді. Нәтижесінде ауылдағы  400-ге жуық жас спортқа тартылды, - деді ол.
Спорт саласы бойынша аудан көлемінде 2018 жылы атқарылған жұмыстар мен алдағы міндеттер туралы аудандық дене шынықтыру және спорт бөлімінің басшысы Нұрлыбек Есбосынов хабарлама жасады. Мәжіліс барысында облыстық дене шынықтыру және спорт басқармасының басшысы Олжас Әкімов сөз алып, аймақ бойынша жыл бойы атқарылған жұмыстарды баяндады.
Жиын соңында мәжіліске қатысушылар өздерінің ұсыныстарын ортаға салып, спорт саласын дамыту мәселелерін талқылады.