Жалағаштағы жастар форумы

         Елбасының «Болашаққа бағдар: рухани жаңғыру» атты мақаласындағы «Атамекен» бағдарламасын насихаттау мақсатында ұйымдастырылған шараға жаңалыққа жаны құмар, жігерлі де, жалынды жастар «Жастар-туған жерге» атты форумда бас қосты.  

Аталмыш форумға Жалағаш ауданының әкімі Қ.Сәрсенбаев, Қызылорда облысының жастар саясаты мәселелері басқармасының басшысы Е.Меңлібаев, айтыскер ақын А.Рахметов, екі мәрте Алтын домбыра иегері М.Ниязов, ҚР Президентінің «Алтын сапа» сыйлығының иегері, «Мағжан және К» ЖШС-нің директоры М.Ералиев және «GRAND master» бағдарламалау мектебінің директоры А.Қуанышбаев қатысты.

Форум 3 секция бойынша жүргізілді. «Жастар рухани жаңғыру жолында» тақырыбындағы бөлімінде «Қызылорда қалалық жастар ресурстық орталығы» КММ-нің директоры Ж.Досмаханов сөз сөйлеп, шараның маңызына тоқталды. АлЖалағаш ауданының тумасы, айтыскер ақын Қазанғап атындағы Қызылорда музыкалық колледжінің оқытушысы А.Рахметов халық әндерін қайта жаңғырту мәселесін көтерді. Ал екінші бөлімде «Жастар саясатын жүзеге асырудың жаңа бағыты» тақырыбында аудандық ішкі саясат бөлімінің басшысы Ғ.Телібаев аудан жастарының жетістігіне тоқталды.

 – 2017 жылдан бастап аудандық жұмыспен қамту орталығы арқылы 11 рет бос жұмыс орындарының жәрмеңкесі өткізіп, 75 жұмыс берушінің тарапынан ұсынылған 158 бос жұмыс орнына 158 адам жұмысқа орналасты. Оның ішінде 29 жасқа дейінгі жастар саны – 35.«Нәтижелі жұмыспен қамтуды және жаппай кәсіпкерлікті дамытудың 2017-2021 жылға арналған бағдарламасының бірінші бағыты аясында 162 адам қысқа мерзімді оқытуға жолданды. Оның 95-сі 29 жасқа дейінгі жастар.  Жыл басынан бері қоғамдық жұмыспен 550 адам қамтылса, оның 124-і 29 жасқа дейінгі жас, – деді Ғ.Телібаев.

Мәселен, Қызылорда облысының жастар саясаты мәселелері басқармасының басшысы Е.Меңлібаев "Жалағаш ауданында 14 пен 29 жас аралығында 8702 жас бар. Бұл көрсеткіш халық санының 24,7 пайызын құрайды. Ал мұндағы жастардың белсенділігі өте жоғары. Қоғамдық шараға белсене араласады" деп жоғары баға берді.

Форумды қорытындылайтын үшінші бөлімде «Цифрлы Қазақстан – ХХІ ғасырдың жаңа мүмкіндіктері» атты тақырыпта ІТ маманы Ф.Абжаппаров, «Гранд Мастер» бағдарламалау мектебінің директоры А.Қуанышбаев, Қызылорда облысының кәсіпкерлер палатасының бөлім басшысы Ж.Серіков заманауи технологияны меңгерудің тың әдісімен бөлісті. Форум барысында аудандағы мемлекеттік жастар саясатын жүргізудегі алдағы жоспар талқыланып, жастардың ұсыныстары мен пікірлері тыңдалды.