Сонау ертеден қазақ халқының құтты мекені болған Сыр өңірі бұл күнде қарыштап даму үстінде. Тәуелсіздік алғалы қала ішінде түрлі нысандар бой көтеріп, инфрақұрылымдар халық игілігіне айналды. Бірақ соңғы екі-үш жылдықтың көлемінде қала халқы үшін жағымды жаңалықтың бірі –Сырдарияның сол жағалауында жаңа қаланың бой көтеруі еді. Облыс әкімі Қырымбек Көшербаевтың бастамасымен жолға қойылған бұл жоба бұл күнде өз нәтижесін беріп жатыр.

Алғаш қос жағалауды біріктірген ұзындығы 387 метр болатын көпір салынды. Міне сол уақыттан бері онда «Тұрғын үй құрылыс жинақ банкінің» және облыс әкімдігінің қолдауымен бес қабатты тұрғын үйлер, түрлі зәулім ғимараттар тұрғызылды. Оның ішінде «Рухани жаңғыру» орталығы, «Қызылорда қаласы тарихы» музейі және Болашақ университеті студенттер қалашығы бар. Сонымен қатар жақында ғана облыс жастарына арналған «Облыстық жастар ресурстық орталығы» бой көтерді.

Бүгінде құрылысы жанданып, бойына қан жүгіре бастаған сол жағалаудың осынау келбеті көз тартарлық. Алдағы 7 жылдықта да ұзын саны 50 мыңнан астам адамды баспанамен қамтамасыз ету жоспарланған аймақта жағымды жаңалықтар еселене түспек. Олай айтар себеп те жоқ емес. Жалпы, жоба аясында 4 денсаулық сақтау мекемесі, 12 балабақша, 16 мектеп және соңғы жылдар ел біріншілігінде керемет ойын өрнегін көрсетіп жүрген қаланың басты футбол клубы «Қайсарға» 15 мың жанкүйерге арналған стадион салынады деп күтілуде. Сонымен қоса жоспарда емхана, 3 ірі парк нысаны қарастырылған. Айта кетейік, аталмыш аумақ 15 ауданнан тұратын болады.

Қорыта айтсақ, мұндағы барлық нысандар заманауи түрде жабдықталып, ең соңғы үлгілермен әсемделетін болады. Бұның барлығы біздің қаланың экономикалық және әлеуметтік әл-ауқатының деңгейін жоғарылатады.