Ұстаздар үшін басылымдардың маңызы зор

Қазіргі жаһандану дәуірінде, ақпараттың технологияның жылдам дамыған заманында баспасөздің дәуірі өтіп бара жатқан жоқ па деген сұрақ бүкіл қоғамды ойлантуда? Жасырын емес, бүгінде газет- журналдарға жазылу үлкен бір мәселеге айналды. Қала тұрғындары, әсіресе жастардың басым көпшілігі қажетті мәліметті ғаламтордан аламыз, бізге газет- журналдарға жазылудың не қажеті бар деп ойлайды. Баспасөз – қай кезеңде болсын халық арасында қажетті ақпарат таратуға, қоғамдық пікір мен саяси көзқарас қалыптастыруға, мемлекеттің, әлеуметтік топтардың не жекелеген тұлғалардың мүддесін танытуға қызмет етіп келеді. Ұстаздар қауымы, соның ішінде ауыл ұстаздары зиялы қауым өкілі ретінде ешқашан баспасөзден бас тартқан емес.

Бүгінде не көп, түрлі-түсті басылымдар көп. Бірақ оның ішінде шынайы ақпарат беріп, адамның ой- өрісін дамытатын, саяси сауаттылыққа жетелейтін басылымдар некен-саяқ. Осы басылымдарды електен өткізіп, керектісін тауып оқу оқырманның өзіне байланысты. Біздің ұжымдағы ұстаздар өздеріне қажетті газет-журналдарға жазылып қана қоймай, ондағы қажетті ақпараттарды болашақ ұрпақты оқыту мен тәрбиелеуде тиімді қолданып келеді. Өз мамандықтарына байланысты әдістемелік басылымдармен қатар, республикалық «Егемен Қазақстан», облыстық «Сыр бойы», «Ақмешіт жастары», «Шарайна-Сейхун», аудандық «Өскен өңір» газеттерін үзбей оқиды. Соның ішінде «Ақмешіт жастары» газеті жалынды жастардың жанды жұмыстарын насихаттайтын басылым. Бұл басылымдарға жазылуда мұғалімдерге ешқандай қысым жасалмайды. Мұғалім - қай кезде де қоғам айнасы, белсенді тұлға және ақпарат жаршысы. Газет- журналдарға жазылумен қатар, қоғамда болып жатқан өзекті мәселелерге үн қосу, өз көзқарасын білдіру мақсатында мақалаларын да жариялап тұрады. Сондықтан басылымдарға жазылудың ұстаздар үшін маңызы зор.