Жасотандықтарға куәлік табыстады

   
Jas Otan ЖҚ төрағасы Елнұр Бейсенбаев облысқа сапары аясында «Абзал и К» ТС зауытының жас мамандарымен кездесті. Кәсіпорынның тыныс-тіршілігімен танысқан Елнұр Сабыржанұлы жас мамандардың 2025 жылға дейінгі «Jastar Otanga!» бағдарламасына қатысты ұсынысын тыңдап, пікір алмасты.

«Абзал және К» ТС – ауылшаруашылық саласында, оның ішінде еліміздің күріш индустриясы саласында қарқынды дамып келе жатқан компанияның бірі. Компания республика бойынша күріш өндірісі үздіктерінің үштігіне кіреді. Өз өнімін Қазақстанмен қатар Ресей, Әзірбайжан, Украина, Түркменстан, Өзбекстан, Тәжікстан, Моңғолия, Қырғызстан, Ауғанстан мемлекеттерінің нарығына шығарады. Айта кету керек, «Абзал және К» ТС зауытында 400-ден астам қызметкер жұмыс істейді, оның 70%-ын 22-29 жас аралығындағы жас маман құрайды.

«Jastar Otanga!» бағдарламасына ұсыныстар жинау мақсатында кездесу Қорқыт ата атындағы ҚМУ-да және М.Мәметова атындағы жоғары педагогикалық колледжінде жалғасты. Елнұр Сабыржанұлы жастарға байланысты көкейтесті мәселені, жасотандықтар алдында тұрған келелі міндетті айтып, студенттердің сұрағына жауап берді. Jas Otan Жастар қанатына қабылданған оқу орнының белсенді жастарына куәлік табыстады.

Айғаным ҚҰРМАШЕВА
ҚМУ-дың IV курс студенті