– Әбдіжәміл Нұрпейісов ауызекі сөзге сараң, кірпияз, кез келген жерде сөйлей бермейтін әрі әркімге ашыла қоймайтын кісі. Ағынан жарылып, шешіліп сөйлеуі қиындау. Абыздың осы бір бекзат болмысын оның романдарындағы әр кейіпкерден аңдауға болатындай.

Ол шығармашылық жолын бірден роман жазудан бастаған адам. Ғасыр басындағы зобалаңға арнаған «Қан мен тер» романы оқырман жүрегіне жол тауып, ә деген-ақ қалың жұртшылықтың сүйікті кітабына айналады. Уақыт өзгергенмен шығарманың басты тақырыбы – халықтың әлеуметтік жағдайы өзгерген жоқ. Осындайда жазушы шеберлігіне таң қалмасқа әддің жоқ. Жазушы сомдаған әрбір кейіпкерді бірден ұмытып кету қиын.

Қалам ұстағанның бәріне бірдей бұйыра бермейтін бақ – зор шығармашылық қуат Әбдіжәміл Нұрпейісовке берілген екен. Жазушы бақыты деген бәлкім осы шығар.