– Өңірімізде пневмонияның өсу көрсеткіші байқалады. Қала тұрғындарының кейбірі үйде емделіп, ауруын асқындырып, жансақтау бөліміне түсуде. Бұл қатты алаңдатады. Күннің суытуына байланысты тұмау белгілері де артуда. Сондықтан әр азаматтың аурудың белгілері білінгенде үйде ем қабылдамай, бірден емханаға, дәрігерге хабарласуын сұраймыз. Мемлекет басшысының індеттің жаппай таралуының алдын алуға қатысты тапсырмаларына байланысты облыс әкімінің бақылауымен арнайы іс-шаралар қабылданып, жұмыс жүргізілуде, – деді облыс әкімінің орынбасары Н.Байқадамов.

Жыл басында тапшылығы байқалған өкпені желдету аппараттары бүгінде 244-ке жеткен. Тыныс алу жолдары ауруларының көбеюі кезінде оттегіні жылдам жеткізудің өте маңызды екені белгілі. Алдағы уақытта «ПетроҚазақстан» компаниясының демеушілігімен Қазалы ауданында оттегі станциясы салынады. Осы станциядан Арал және Қармақшы аудандарын, Байқоңыр қаласын оттегімен қамтамасыз ете алады. Екінші оттегі станциясы «ҚазГермұнай» компаниясының демеушілігімен көпбейінді облыстық ауруханасы базасынан бой көтереді. Бұл қала аумағындағы ауруханаларды және Сырдария, Жалағаш аудандарын қамтамасыз етеді.

Қысылтаяң уақыт тақап, әр минут маңызды болатын уақытта жедел жәрдем қызметінің жылдам жетуіне автокөліктерінің техникалық жағдайы әсер ететіні сөзсіз. Облыста 79 жедел жәрдем бригадасы жұмыс істейтін болса, оның жартысынан астамының тозығы жеткен. Облыс әкімінің қолдауымен өткен аптада лизинг арқылы 40 санитарлық автокөлік облысқа жеткізіліп, облыс көлеміне таратылды. Сонымен қатар «Аралтұз» АҚ демеушілігімен екі арнайы автокөлік сыйға тартылды. Алдағы уақытта да ықтимал болжам бойынша мобильдік бригадалар толығымен қайта жұмылдырып, тұрғындарға медициналық көмек, оның ішінде дәрілік заттарды жеткізу, медициналық манипуляция, үй жағдайындағы стационар жағдайына толық қызмет атқарады.