Елімізде «7-20-25» бағдарламасы бойынша ипотекалық несие беріле бастады. Бастама іске қосылған бірінші күннің өзінде баспаналы болуға ниетті азаматтардан 3 мыңнан астам өтінім келіп түскен. Қазіргі уақытта екінші деңгейлі банктермен 7 келісім-шарт жасалған. Бұл туралы арнамызда өткен «Круглый стол» бағдарламасы аясында «Баспана» ипотекалық ұйымының» басқарма төрағасы Қайрат Алтынбеков мәлімдеді. Оның айтуынша, бүгінде 1 миллиард теңге көлемінде несие мақұлданып, жақын арада азаматтарға берілмек. Қайрат Алтынбеков, «Баспана» ипотекалық ұйымы» АҚ басқарма төрағасы: - Біз осыдан 3-4 күн бұрын бағдарламаны іске қостық. Астана, Алматы, Ақтау, Орал қалаларында 7 несие берілді. Қазіргі уақытта бұл жобаға халықтан сұраныс жоғары. Күн сайын телефонға хабарласушылар көп, хаттар түсіп жатыр.