Сұлу Сырдың 200 жылдық мерекесі аясында облыстық жастар саясаты мәселелері басқармасының қолдауымен "Ұлттың айбыны – рух байлығы" атты республикалық жас ақындар айтысы өтті.  Жас айтыскерлер сайысына барлығы 5 жұп қатысты. Сахнаға шыққан арқалы жас ақындар қоғамдағы түрлі мәселелерді ортаға салды. Қағытпа қалжыңдар мен орамды ойлар айтып, А.Тоқмағанбетов атындағы мәдениет үйінде көрермендердің ыстық ықыласына бөленді. Әсіресе, алматылық Жібек Шахмардан мен Нұрмұхаммед Байсүгіров, Нартай Тілеуқұл, Бекжан Ержігіт, Дәурен Ысқақ, Сырым Әділбековтер көптің көңілінен шықты. Нәтижесінде 6 ақын ынталандыру сыйлығына ие болды. Алматының Жібегіне ІІІ орын бұйырса, ІІ орынға қос ақын қарағандылық Нұрмұхаммед Байсүгіров пен ақтөбелік Нартай Тілеуқұл лайық деп танылды. Ал бас жүлде, 400 мың теңгені астаналық ақын Сырым Әділбеков иеленді.