23 ақпан күні түс ауа Қарауылтөбе ауылдық округіндегі тұрғын үйде газ балон жарылысы салдарынан адамдар зардап шеккені туралы 112-нөміріне хабарлама түскен. Орын алған жайтқа байланысты Өңірлік коммуникациялар қызметінде өткен баспасөз брифингінде Қызылорда облысы жұмылдыру дайындығы басқармасы басшысының орынбасары Ерлан Бакиров мәлімдеме жасады.

– Қарауылтөбе ауылдық округінде Сансызбаева деген азаматшадан “112” бірыңғай басқару пультіне хабарлама түскен. Үйде жарылған газ баллонның әсерінен қабырға құлап, екі адам үйінді астында қалған. Олардың бірі 1964 жылғы Балдырған Аймағанбетов және 1979 жылғы Сандуғаш Сейдахметова. Олардың бірі – жамбас сүйегінің жабық сынуы, бірі – І және ІІ дәрежелі күйік шалу диагнозымен ауруханаға жатқызылды. Бұл оқиғаға байланысты бүкіл мәліметтер төтенше жағдайлар департаменті мен Қызылорда қаласы полиция басқармасына жолданды. Жарылыс 5 литрлік газ баллонының редукторындағы ақаудан деген болжам бар, – дейді Қызылорда облысы жұмылдыру дайындығы басқармасы басшысының орынбасары Ерлан Бакиров.

Қазіргі таңда тергеу әрекеттері жүргізіліп жатыр. Оқиғаның нақты себебі тергеу қорытындысынан кейін белгілі болады.