Осы аптаның басында Қазақстан Республикасының Парламент Сенаты депутаттары Мұрат Бақтиярұлы мен Бекмырза Еламанов арнайы жұмыс сапарымен Қазалы ауданына келді.

Халық қалаулыларының негізгі мақсаты Елбасының Қазақстан халқына «Бақуатты қоғам: онжылдықтың 10 мақсаты» атты 2030 жылға дейінгі жаңа бағдарламасын жүзеге асыруда туындайтын мақсаттар мен міндеттерді өңірлерде ақпараттық-насихаттау.

Сенаторлар алдымен Қазалы ауданаралық ауруханасында болып, медицина қызметкерлерімен кездесті. Басқосуды аудан әкімінің орынбасары Әлімжан Жарылқағанов жүргізіп, алдағы жұмыстардың бағыт-бағдарына тоқталды.

Кездесу барысында Елбасымыз Нұрсұлтан Әбішұлы Назарбаевтың 26 ақпандағы «Нұр Отан» партиясының съезінде көтерілген мәселелер бойынша түсіндірме жұмыстарын жүргізді. Мұрат Бақтиярұлы ең бірінші мақсат – халық денсаулығы, одан кейін білімі және әлеуметтік ахуалының қорғалып, жоғарғы деңгейде болуы деп өз сөзінде атап көрсетті.

– Елімізде медициналық қызметтің көрсету сапасын жақсарту үшін ең бірінші мамандардың еңбекақыларын көтеру басты назарда. 2019 жылдың 1 шілдесінен бастап орта буын қызметкерлерінің айлық жалақысы 30 пайызға көтерілетін болады. Қазіргі уақытта медицина саласын сандық форматқа көшіру жүзеге асырылып жатыр. Бұл медицина саласын қағазбастылықтан арылтуға апаратын бірден-бір жол және сапалы, аз уақыт ішінде қызмет көрсету мүмкіндігін береді, – деді ол.

Парламент Сенатының депутаты Бекмырза Еламанов елiмiздi одан әрi дамытуда, бағдарламаны өңірлерде жүзеге асыруда сапалы заңнамалық қамтамасыз етудiң маңызды екенiн атап, өзгерістер мен толықтырулар енгізілген заңнамаларға тоқталып өтті.