Қазіргі таңда Абай атындағы Қазақ Ұлттық педагогикалық университетінде информатика пәні мұғалімі мамандығы бойынша білім аламын. Ал сөмке тоқуды күтпеген жерден үйрендім. Күнделікті сабаққа барар жолда әлеуметтік желіні бір шолу мен үшін  дағдыға айналған. Бірде инстаграмдағы @asa_spa тігін орталығының парақшасынан ерекше стильдегі сөмкелерді байқадым. Сөмкенің трикотаж жіптен тоқылғаны, табиғи қол еңбегі екені бірден көрініп тұрды. Өзім сапалы өнімді жақсы көретіндіктен сол сәт тоқыма өнерін үйренгім келді. Парақшада сөмке құны – 7 мың теңге, ал шеберлік сағаты – 15 мың теңге деп жазылыпты. Мен студент болғандықтан, ұзақ ойландым. Шәкіртақым небәрі 20 мың теңге болса да, тәуекелге бел будым және бұл ойымды ата-анама айтпауға бекіндім. Себебі ол кісілер қарсылық білдірсе, «бастапқы ойымнан айнып қаламын ба» деп қорықтым. Маған тоқыманы әнші Нұрлан Еспановтың жары Жанар апай үйретті. Бір топта осы кезге дейін тоқымадан бейхабар жеті қыз оқыдық.

      Бүгінде сөмкеге қызығып тапсырыс берушілердің қарасы қалың. Тоқымаға сабақ уақытынан тыс кезде көңіл бөлемін, сондықтан бір сөмкені тоқуға екі күн жұмсалады. Кейде тұтынушылар сөмкеге өздері қалаған суретті бейнелеп беруді сұрайды. Тоқымаға қажетті заттар шамамен 8 мың теңгеге жуықтайды, ал түрлі-түсті жіптерге арнайы тапсырыс беремін. Көбіне Ресей, Түркияда жасалған сапалы жіпке тапсырыс беруге тырысамын. Сөмкені тоқу техникасы әртүрлі, оларды бірте-бірте үйренудемін. Мен үшін халықтың сапалы өнім тұтынып, саналы ғұмыр сүргені маңызды. Сондықтан қандай бұйым түрін тоқысам да шын ниетпен, ерекше идеямен жасауға тырысамын.  

Тоқымадан өзге түрлі тәттілер пісіруге де уақыт бөлемін. Әсіресе ел сүйіп жейтін «вупи пай, қызыл бархат» сынды тоқаштарға тапсырыс қабылдаймын. Болашақта осы екі кәсіп түрін дамытып, үлкен сауда орталығын ашуды жоспарлаудамын.