− Робототехникалық чемпионат екі бөлімді қамтыды, алғашқыда «KazRoboproject – 2019» жобасы бойынша көрме ұйымдастырылды. Сол кезеңде Темірлан Хамза екеуміз «Әмбебап зерттеуші роботтың» жобасын қорғап, бас жүлдені иемдендік. Ал келесі кезең  «KazRobosport» спорттық робототехникалар жарысына арналды, мен бұл айналымда «биатлон» сайысына қатысып жеңімпаз атандым. «Әмбебап зерттеуші роботты» құрастыру үш айға созылды, оны дайындау барысында шынжыр табанды жол таңдамайтын көлік механизмін таңдадық. Себебі бастапқыда роботты әртүрлі жолда кедергісіз жүре алу қажет деп жоспарлағанбыз. Робот толығымен 3D принтер арқылы құйылған, ал электроникасы италияндық Arduino uno микропроцессорының көмегімен жасалған. Біз сол арқылы роботқа түрлі датчиктер орнаттық. Атап айтсақ, робот «ДНТ 11» датчигі арқылы температура мен ылғалдылықты анықтайды, «MQ – 4» датчигімен газ мөлшерін есептейді, ал «НС – SR04» ультрадыбысты көру датчигінің көмегімен жолындағы кедергіден қиындықсыз өтеді. Сонымен қатар роботты алыстан басқару үшін «ESP8266» деп аталатын wi-fi модулін қолдандық, сол жерде  жинақталған ақпаратты сұйық кристалды дисплей арқылы көруге болады.

Бұл жобадан бөлек осы кезге дейін «Қолғанат дрон», «Дауыспен басқарылатын роботқол» сынды жобалар дайындағанмын. Аймақтық іріктеу чемпионаты бізге тың тәжірибе мен мол мүмкіндік сыйлады. Ол жерден өзіміз қатарлы оқушылардың жобаларына куә болдық, соның ішінен «Ақылды ауылдың прототипі» жобасы ерекше ұнады.

− Әмбебап зерттеуші робот арнайы бағдарлама бойынша жұмыс істейді, сонымен қоса жердің ылғалдылығы мен құнарлығына, ауа температурасы мен  тазалығына зерттеу жүргізе алады.  Жобаның басты артықшылығы робот толықтай автономды режимде құрастырылған, әзірге айтарлықтай кемшілік жоқ. Дегенмен болашақта  жобаны одан әрі жетілдіретін боламыз. Робот негізі өзге ғаламшарды зерттеуге бағытталған, бірақ жер бетіндегі кез келген орынға бару мүмкіндігіне де ие. Мысалы Семей полигонындағы радиация адам денсаулығына қауіпті, енді ол жерге әмбебап зерттеуші робот көмегімен толықтай зерттеу жүргізуге болады. Бізге роботты жасау технологиясын Оқушылар сарайындағы робототехника үйірмесінің жетекшісі Раушанбек Сариев үйреткен болатын. Роботтан өзге былтыр «Ақылды үй» жобасын жасап шығардым, сол арқылы облыстық іріктеуден өтіп, республикалық жарысқа жолдама алдым. «Ақылды үй»  жобасы адам өмірін жеңілдетуге арналған, мысалы сыртқы есігі өзі ашылып, жабылады. Жарық автоматтандырылған, өсімдіктерді өзі суарып, баптай алатын мүмкіндіктірге ие.