Бүгін – патриоттық сезімді арттырып, ел егемендігін айқындаған мемлекеттік рәміздер күні. Әрқайсысының астарында өзіндік ерекшелігі, халқымыздың тағылымға толы тарихы бар.

Туымыздың көк түсі – біртұтастықтың, бірліктің, нұрға малынған алтын күн – тыныштық пен байлықтың, қалқып ұшқан дала қыраны – күштің, еркіндіктің белгісі. Қошқар мүйіз ою-өрнегі – мәдениет пен дәстүр даралығының нышаны. Бүгінгі күні біздің көк байрағымыз Біріккен Ұлттар Ұйымының, бүкіл дүние жүзіндегі мемлекеттердің елшілік  ғимаратының маңдайшасында тұр. Авторы – суретшi Ш.Ниязбеков.

Мектепте дүйсенбідегі бірінші сабақта оң қолымызды жүрек тұсына қойып, міндетті түрде әнұран шырқаймыз. Бұрын «Менің Қазақстаным» әні ретінде танымал болған Қазақстанның гимні 2006 жылы 6 қаңтарда еліміздің Парламентінде бекітілді. Әнұран бірінші рет сол жылы 11 қаңтарда Мемлекет басшысының салтанатты ұлықтау рәсімінде орындалды. Әннің авторы – Ш.Қалдаяқов, сөзін жазған – Ж.Нәжімеденов, Н.Назарбаев.

Рәмiздiк тұрғыдан елтаңбаның негiзi – шаңырақ. Шаңырақ – мемлекеттiң түп-негiзi отбасының, тұлпар – жеңiске деген жасымас жiгердiң, қажымас қайраттың, бостандыққа ұмтылудың бейнесi. Ұшқыр арманның, жақсылыққа құштарлықтың белгісіндей қанатты тұлпар уақыт пен кеңiстiктi бiрiктiредi. Бiр шаңырақтың астында тату-тәттi өмiр сүретiн Қазақстан халқының өсiп-өркендеуiн паш етедi. Елтаңба авторы – Ж.Мәлiбеков және Ш.Уәлиханов.

Осыдан 26 жыл бұрын қабылданған мемлекеттік рәміздер еліміздің егемендігін, тарихын, халқының біртұтастығын айқындайды. Рәміздердің мағынасын, маңызын сезініп, авторын тану, әрі аяқ асты етпей, құрметтеу – парыз. Ал бізге, жастарға, оларды кеңінен насихаттап,  ұрпақтан ұрпаққа жалғастыру – міндет.