МИЛЛИОНЕР МЕКТЕП МҰРАГЕРДЕ 115 ЖАС МҰҒАЛІМ ЖҰМЫС ІСТЕЙДІ
Жаңа оқу жылына санаулы күндер қалғанда жыл сайын дәстүрлі тамыз кеңесі өтеді. Онда өткен оқу жылындағы жетістіктер сараланып, кемшіліктер айтылып, өз ісін абыроймен атқарған ұстаздар мен үздік ұжым марапатталады. Биыл да бұл игі дәстүр жалғасын тауып, А.Тоқмағанбетов атындағы мәдениет үйінде тамыз кеңесі өтті. Салтанатты жиында облыс әкімінің орынбасары Руслан Рүстемов Мұрагер мектебінің директоры Динара Қонақбайқызына «Үздік орта білім ұйымы» номинациясы бойынша 17 миллион теңгені табыстады.Үздік ұжымның қуанышын бөлісу мақсатында Мұрагер мектебінің директордың оқу ісі жөніндегі орынбасары Айгүл Алтынбекқызымен телефон арқылы байланыстық.– Марапат құтты болсын! Бұл жеңіс ұжымға қандай серпіліс әкелді?
– Бірнеше жыл қатарынан бұл конкурсқа қатысып, бағымызды сынап келеміз. Биыл осы жүлдеге қол жеткіздік. Қуанышымызды бір сөзбен жеткізу мүмкін емес. Жаңа оқу жылындағы тосын сый болды. Біз бұл жетістікпен тоқталмаймыз. Одан әрі білімімізді шыңдаймыз. Білімді, бәсекеге сай оқушылар дайындауда күш-жігерімізді саламыз.
– 17 миллион қайда жұмсалады?
– Көпшілік көкейінде қомақты қаражатты қайда жұмсайды екен деген сұрақ тұрғаны белгілі. Біздің ұжым ақылдаса келе, бұл қаражатқа мектепке қажетті жаңа құрылғы, құрал-жабдық сатып аламыз деп шештік. Өйткені бұл – мектептің жеңісі.
– Өткен оқу жылының қорытындысына көңіліңіз тола ма?
– Мектепті 9 алтын белгі, 14 үздік аттестат иегері бітірді. Сондай-ақ 11 сыныпты бітірген 107 оқушының 65-і шетелге және мемлекеттік грант иегері атанды.
