ЖАСТАР ТАҢДАЙДЫ
Ә.Тәжібаев атындағы облыстық әмбебап ғылыми кітапханасының «Кітапханаларды дамыту» бөлімінің меңгерушісі, Қалдыгүл Досмағанбетова:
Жоба туралы
Жастарды кітап оқуға қызықтыру – біздің жұмысымыз. Бірақ алдымызда «қалай?» деген сұрақ тұрды. Ғаламторға телмірген жаспен байланысқа өзінің замандасы және әлеуметтік желі арқылы шығайық дедік. Осылайша «Жастар таңдайды» жобасы жарық көрді. Байқаудың шарты бойынша кез-келген жас өзінің сүйікті кітабын насихаттап, оқырманды қызықтырып, жан-жақты түсіндіріп, бейнеролик түсіру қажет. Біздің мақсатымыз – бейнероликтің сапасына мән беріп, жастардың көңілінен шыққан 100 кітапты анықтау болды. Осылайша 2018 жылдың 15 мамыр мен 7 тамыз аралығында байқауға қатысушылардан жұмыстар келе бастады.Барлығы 903 видеоролик қабылданды, соның ішінде 166-ы жарамсыз деп танылды. Байқаудың жеңімпаздарын арнайы бекітілген комиссия анықтады.
Абайдың ескерткіші алдындағы бала
22 тамызда байқау қорытынды бойынша салтанатты шара өтті. Кітапхана директоры Н.Мырзамұратова байқау жеңімпаздарын құттықтады. Iорынды Қазалы ауданы, Кәукей ауылының тұрғыны Назерке Байбек, II орынды Қызылорда қаласынан Айтолқын Әділбек, IIIорынды да Қызылорда қаласының тұрғыны Төребай Тұрсынбай иеленді. Ынталандыру жүлдесіАралдың тумасы Саяна Ашиноваға және Сырдария ауданы, Қалжан ахун ауылынан белсенділік танытқан Гүлнұр Кажденбековаға бұйырды. Дегенмен өзіме Төребайдың бейнеролигі ерекше әсер етті. Ол Абай Құнанбайұлының ескерткішінің алдында тұрып, қара сөздерінің жинағын басқаша таныстырды.
Оқырмандар да көре алады
Қатысушылардың бейнеролигін комиссия шешімімен арнайы дискке көшірдік. Енді кітапханаға келген кез келген оқырман оны қосып, көре алады.
Әсел БЕГМАН
